Bakı şəhəri, Nizami rayonu, C.Naxçıvanski 54 A, mənzil 48-də yaşayan Şabanov Camal Qafur oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi iddia edir ki, Bakı Sağlamlıq Mərkəzində işləyən Alxasov Hüseyn adlı həkim onun əməliyyatını düzgün etməyib:

“Mən, Şabanov Camal Qafur oğlu, yazaraq bildirirəm ki, şəkər xəstəsiyəm, daimi müalicədəyəm. Həmçinin, damar xəstəliyim də var. 

28 fevral, 2024-ci ildə Bakı Sağlamlıq Mərkəzində Alxasov Hüseyn adlı həkim məni əməliyyat etdi. Əməliyyat zamanı həkim adı daşıyan bu şəxs damarımı zədələyib. Hal-hazırda ayağımda problemlər bitmir. Əslində, bu əməliyyatı Ruslan Əliyev etməli idi. Lakin həmin gün işi çıxdığından, yerinə Alxasov Hüseyni göndərib.

Öyrəndiyim məlumata əsasən deyim ki, Alxasov Hüseyn “Maşınqayırma” kollecini bitirib. Nə ali savadı, nə də tibbi savadı yoxdur.  Amma bu adam Bakı Sağlamlıq Mərkəzində əməliyyatlar keçirir. Bu barədə Prezident Administrasiyasından tutmuş, bir çox qurumlara yazılı müraciət etmişəm”. 

Məsələ ilə bağlı Bakı Sağlamlıq Mərkəzi ilə əlaqə saxlamağa çalışsaq da, mümkün olmadı. 

Jalə FAMİLQIZI

Redaksiyadan: Yazıda adları qeyd olunan şəxslərin mövqeyini dərc etməyə hazırıq.