Ukrayna dövlət rəsmilərinin Buçaya səfəri zamanı jurnalistlərə şəhərdəki evlərdən birinin zirzəmisindən 5 meyitin çıxarılması göstərilib.
Muxalifet.az CNN-ə istinadən xəbər verir ki, müvafiq videonu daxili işlər nazirinin müavini Anton Qraşçenko yayıb.
Bildirilir ki, həmin meyitlər bir neçə gün əvvəl rus hərbçilərinin nəzarətində olan ərazidə tapılıb. Bu yerin ətrafında hələ də bir neçə səngər və zirehli texnika üçün mövqelər, habelə rus əsgərlərinin yeməklərinin qalıqları görünür. Ərazinin girişində bir neçə “V” – rus işğalının simvolları da çəkilib.
Ölənlərin əlləri arxadan bağlı olub, əksəriyyətində bir neçə güllə yarası aşkarlanıb - təkcə başlarında deyil, həm də aşağı ətraflarında. Cəsədlərin yanında döşəmədə bir neçə giliz də olub.
Könüllülər meyitləri çıxararaq cəsəd torbalarına yerləşdiriblər, sonra oradan götürüblər.
Könüllülərdən biri CNN-ə bildirib ki, indi bir çox evdə cəsədlər tapılır: “Bu, onlarla deyil, yüzlərlədir”.
Könüllülər CNN-ə bazar günü tapılan ən azı 30 nəfərin cəsəd çantalarını, bazar ertəsi isə daha 9 nəfərin, o cümlədən zirzəmidə tapılan beş nəfərin cəsədini göstərib.